Arlogg tal-Birgu

ARLOĠĠ  TAL-BIRGU    It-torri tal-Arloġġ tal-Birgu kien inbena fi pjazza żghira (llum : Pjazza tal-Vitorja) fis-seklu sittax.  Ħadd ma jaf preċiż minn min, għalfejn u meta nbena eżatt dan it-torri. Jingħad biss illi fl-Assedju tal-1565 dan it-torri serva biex l-Kavallieri setgħu josservaw l-pożizzjoni tal-għadu u xi ġlied li seta kien għaddej fix-xaqliba tan nofsinhar tal-Birgu.  It-torri kien mal-40 metru għoli u kien wiesgħa  madwar sitt metri kull naħa. It-torri kellu ballustrad iddur id-dawra kollha tiegħu, speċi ta’ gallarija miftuħa.  Waqt l-Assedju il-Kbir, it-torri kellu żewġt iqniepen, waħda msejħa ‘in-Newwieħa’ u l-oħra ‘il-Ferrieħa’.  Meta l-Ordni mar jabita fil-belt Valletta, t-torri ġie mogħti lil familja minn Ħal Għaxaq.  Biż-żmien imbena’ wkoll arloġġ u kien hemm bniedem apposta li kien jieħu ħsieb li l-arloġġ  jaħdem tajjeb. Fit-Tieni Gwerra Dinjija it-torri ġarrab sħarat kbar waqt attakk mill-ajru li seħħ fl-4 ta’ April 1942.  Ftit jiem wara il-qbija tal-binja tat-torri ġie mwaqqa’ biex ma tkunx ta’ periklu għan-nies.